Curriculum Information

Bydd Profiad Ysgol ym Mlwyddyn 3 yn cynnwys bloc o wyth wythnos yn yr ysgol i alluogi athrawon dan hyfforddiant i ddangos cynnydd cyson tuag at gaffael y Safonau Proffesiynol ar gyfer Addysgu ac Arweinyddiaeth, 2017. Bydd bloc arall o bedair wythnos yn ddiweddarach yn y flwyddyn, lle bydd athrawon dan hyfforddiant yn ymgymryd â'r prosiect ymchwiliad gweithredol a amlinellir uchod yn y modiwl Astudiaethau Pwnc 3A. Mae'r bloc olaf hwn o ymarfer mewn ysgolion hefyd yn rhoi cyfle i athrawon dan hyfforddiant astudio mewn lleoliad tramor.

Yn y modiwl hwn, mae athrawon dan hyfforddiant yn datblygu ac yn mireinio ymhellach eu dealltwriaeth o bolisïau ysgol allweddol sy'n ymwneud â blaenoriaethau cenedlaethol megis diogelu, iechyd a diogelwch, rheoli ymddygiad, asesu/marcio, llesiant, y Cwricwlwm Cymreig, Cymhwysedd Digidol, gwahaniaethu, rhifedd a llythrennedd, a dod yn gyfarwydd â rolau arweinwyr dysgu.

Bydd athrawon dan hyfforddiant yn cynllunio dilyniannau o sesiynau ac yn cyd-gyflwyno sesiynau dysgu ac addysgu gyda mentoriaid a thiwtoriaid Prifysgol yn dilyn fformat a nodwyd yn Llawlyfr Profiad Ysgol PDC. *Bydd athrawon dan hyfforddiant yn addysgu'r dosbarth cyfan neu grwpiau yn ôl y gofyn ac yn dangos lefel o gymhwysedd ychwanegol wrth reoli oedolion o fewn yr amgylchedd dysgu.

Ar gyfer gwersi cynlluniedig, bydd athrawon dan hyfforddiant yn paratoi adnoddau gwahaniaethol i gymell, ymgysylltu a herio disgyblion ac i gefnogi eu dysgu. Byddan nhw'n dewis ac yn defnyddio adnoddau a gynhyrchwyd yn broffesiynol fel y bo'n briodol.

Gyda chymorth mentor/tiwtor, bydd athrawon dan hyfforddiant yn rhoi adborth cadarnhaol a defnyddiol ar lafar ac yn ysgrifenedig i ddysgwyr, yn ôl eu hangen a'u cam datblygu.

Bydd athrawon dan hyfforddiant yn ymgymryd â sawl gweithgaredd yn ogystal ag addysgu, gan gynnwys cymryd rhan mewn gweithgareddau dysgu a ysgogir gan yr athro, arsylwi ar athrawon, dysgwyr a gweithwyr proffesiynol eraill, gan ddatblygu ymhellach eu menter a'u hymreolaeth.

Bydd athrawon dan hyfforddiant yn olrhain cynnydd dysgwyr sy'n cynrychioli ystod gallu o fewn y lleoliad a byddant yn cyfrannu at lunio adroddiadau statudol i rieni/gofalwyr gan ddefnyddio fformatau priodol.

Gan ddangos annibyniaeth, bydd athrawon dan hyfforddiant, er enghraifft, yn rhyngweithio â gweithwyr proffesiynol ac oedolion eraill sy'n ymwneud â'r broses ddysgu a, lle bo'n briodol, yn arwain ar ddefnydd effeithiol ohonynt.

Bydd athrawon dan hyfforddiant yn cefnogi athrawon yng ngweithgareddau ehangach yr ysgol megis goruchwylio amseroedd egwyl, cofrestru disgyblion, arwain gweithgareddau allgyrsiol, mynychu cyfarfodydd staff a chyfarfodydd ymgynghori â rhieni a, lle y bo'n bosibl, cyfleoedd dysgu a datblygu proffesiynol.

Bydd athrawon dan hyfforddiant yn gwerthuso yn ystod ac ar ôl mewnbynnau addysgu, gan nodi cyflawniadau dysgwyr a meysydd i'w datblygu; cryfderau addysgu a meysydd i'w datblygu; a goblygiadau ar gyfer addysgu a dysgu yn y dyfodol yn dilyn asesiad crynodol yn erbyn meincnodau statudol.

Bydd yn ofynnol i athrawon dan hyfforddiant goladu tystiolaeth o gaffael y
Safonau Proffesiynol ar gyfer Addysgu ac Arweinyddiaeth (LlC, 2017), a adolygir drwy gydol y flwyddyn.